7.Ilm Aur Amal

Maulana Rumi Rehmatullahi Ta’ala Alaih farmate hain,

Mere parwane ne mujhse kaha asli cheez ilm hai. Maine jawab diya ahle ilm (ilm wale) aur talib (talabgar, seeker) amal kahan hain taake mai unhe amal karke dikhaun. Tu amal ka talib ban taake mai tujhe kuch dikhaun. Mujhe duniya me aise mard ki zarurat hai jise mai amal dikha sakun. Kirdaar ka khareeddaar mujhe nahi milta, guftaar (baatein , guftagu ) ka khareeddaar miljata hai.

Tu amal ko kya jaane jab ki tu amil nahi. Amal ko amal se samjha ja sakta hai, ilm ko ilm se, surat ko surat se, aur maaine ko maaine se. Aakhir namaz roza to amal nahi, ye to amal ki zahiri surat hai. Amal roohani hai aur wo batin (androoni) me hai.

Hazrat Adam Alaihissalam ke zamane se lekar Huzur Sarware Kaainat Sallallahu Alaihiwasallam ke waqt tak namaz roza maujood surat me na the aur amal tha. Pass ye amal ki surat hui. Amal dar asal roohani hai aur ye insan ke batin me hai. Ab yahan amal se muraad amal ki surat nahi. Isse ma’nwiat (batin) muraad hai.

Pass amal ye nahi hai jo logon ne samjha hai. Wo (log) samajhte hain ki amal ek zahira (dikhnewala) cheez hai. Agar munafiq admi is surati amal se kahin kaam le to ye iske liye fayda rakhta hai, jab isme sadaq aur iman ki ma’nwiat (batin) nahi to ye sab cheezein jinhe tu amal kehta hai mahaz guftaar (baatein, guftagu) aur qaul (baat) hain. Tujhe guftaar aur qaul ki khabar nahi.Guftaar wa rakhti (zahir, libaas) amal ka phal hai kyunki qaul amal se paida hota hai.

Khuda Ta’ala ne duniya ko qaul hi se paida kiya tha, kaha
Kun fayakun
Tarjuma : hoja, pass hojayega

Aur iman dil me hai. Agar iska izhaar qaul se na ho to besood hai.

Kitab : Malfuzaate Rumi, Feehi Ma Feehi

Khulasa : Maulana Rumi jo ke bahut bade Wali Allah hain farmate hain,

Har koi zahiri cheez ke piche laga hua hai lekin haqeeqat ko koi nahi jaanna chahraha. Amal wo nahi jo zahir karte hain (jaise namaz roza hajj zakat wagera), ye to amal ka zahir hai. Ye amal ki surat to Sarkar Sallallahu Alaihiwasallam ke shariat me mili hai lekin isse pehle jitney bhi ambiya aaye wo bhi amal karte the lekin unke amal ki surat aisi na thi jo ummat E Mohammadi me mili hai. To kya unka amal amal nahi tha?

Jab amal ki surat ummat e Mohammadi ko mili to guzre ambiya kis tarah se amal karte the (jaise ki namaz).

To Maulana Rumi farmate hain ye amal nahi hai, ye uski surat (recognition, pehchan) hai lekin haqeeqat me amal roohani taur se hota hai. Isliye farmaye ki logon ne isi surat ko amal maanliya hai jo ki ghalat hai. Isliye aapne misaal di ke agar ghair musalman bhi musalman ki tarah amal kare to kya wo amal kehlayega? Jab roohani taur par amal hota hai to uska asar surat par dikhta hai.

Misaal : agar kisiko buqar ajaye to hum kehte hain ki chehra utargaya hai dekho kitni buqar hai. Jabki buqar chehre par nahi hai, wo to andruni hisse me hoti hai. Lekin chehre ko dekhkar buqar hai ye kehna ye bewakhufi hai. Doctor chehre ko test nahi karta balke stethoscope rakhkar check karta hai.

Jab tak amal ke ilm ko hasil nahi karenge tab tak amal ki pehchan uski haqeeqat ko nahi samjhenge aur hum aise hi zahir taur par amal karte hue hi apne apko gumrahi me dhakel rahe hain.