3.Alim Ba Amal Wa Faqeer Arif Kaun?

Sultanul Aarifeen Hazrat Sultan Shah Bahu Rehmatullahi Alaih farmate hain,

Jaanna chahiye ki ba amal alim aur faqeer arif kamil wo hai ke sote waqt apne nafs se kahe ke mujh par Allah tabarak wa ta'ala ne ita'at wa ibadat, zikr wa fikr, maarifat wa sa'adat ke liye paida kiya hai, na ki sone ke liye paida kiya hai.

Aye nafs tere sone ki jagah qabr hai ke ek pehlu par kayi saal tak soya rahega. Ibadat khudawandi karle kyuki qayamat aur hashr wa siraat ka arsah darpesh hai.

Kitab : Ganj Ul Asrar

Khulasa : Sultanul Aarifeen farma rahe hain ki Alim Wa Faqeer wo hai jo har waqt yahan tak ke sote waqt bhi apne nafs ki nafi kare aur har waqt ye khayal kare ki Allah Ta'ala ne duniya me mujhe uski maarifat hasil karne ke liye paida kiya hai.

Allah Ta'ala ne farmaya,

Ya Ayyuhallazeena Aamanuttaqullaha Wa Koonu Ma'as Sadiqeen

Tarjuma :
Aye Imanwalo Allah se darte raho aur ahle sadaq me shamil raho.

Surah Tawba, Ayat 119

Har koi Alim Wa Faqeer nahi banta lekin Allah Ta'ala ne farmaya ki ahle sadaq yaani sachchon ke saath hojao. Sachche saaf dil to Awliya Allah hote hain aur inke saath hone ko Allah Ta'ala hukm farmata hai.