1.Gham E Imam Hussain A.S - Part 2

🍂Hadd to ye hai ki log mohorrum me hare kapde pehenne tak ko najaiz kehte hain. Becharon ko ye bhi nahi malum ki kisi bhi mauqe par koi bhi rang pehenne par kisi bhi qism ki pabandi nahi hai aur mohorrum me hare kapde pehenne ki ek wajah ye hai ki Hazrat Imam Hasan ko hara aur Imam Hussain ko laal rang pasand tha. Kyuki laal rang khushi ki pehchan hai isliye hara rang pehen liya jaata hai.
Sarkar Sallallahu Alaihiwasallam ke hadees ke mutabik Imam Hasan aur Imam Hussain me koi farq nahi hai isliye Hazrat Imam Hasan ke pasand ka hara rang pehenliya jaata hai. Vaise Gumbad E Khizra ka rang bhi hara hai aur isi nisbat se hara rang pehenliya jaata aur usse is baat ki pehchan hoti hai hare kapde pehenne wale Hussaini hain.

🍂Hare kapde dekhkar logon ko ye yaad ajata hai ki Mohorrum shuru hogaya hai aur wo Mohorrum ka zamana jisme Islam ki hifazat ke liye Imam Hussain ne shahadat wa Qurbani pesh ki thi.

Is tarah Imam Hussain ki shahadat ki yaad taaza hojati hai aur iman zinda hojata hai. Agar hum sirf gharon me baithkar nazar niyaz karenge to aanewali naslon ko ye bhi malum nahi ho sakega ki Hazrat Imam Hussain kaun the aur Mohorrum me kya hua tha aur uska kya maqsad tha.

 🍂Jo qurbani Allah Ta'ala ne Hazrat Ibrahim Alaihissalam se talab ki thi wo qurbani to hogai thi Hazrat Ismael Alaihissalam ki jagah dumbah rakh diya gaya tha jiski yaad me bakrid manai jaati hai aur qurbani hoti hai aur isko wajib karar di gayi hai. Magar ye qurbani maqbool to thi lekin mukammal nahi thi.

🍂Shahadat ek aisi fazeelat hai jisse nabiyon ka darja bhi buland hua. Nabi ka kya ek aam aadmi ka darja bhi shahadat paakar buland hojata hai kyuki Quran shareef me hai ki shaheed kabhi marta nahi hai ise Allah ki taraf se hayate jaavaid ata hoti hai.

Ab ye kaise mumkin tha ki Huzur Akram Sallallahu Alaihiwasallam jo ki sardare ambiya hain unko ye fazeelat na milti,magar Allah ko ye manzur nahi tha ki uske mehboob ki be hurmati ho. uske alawa ye bhi wajah thi ki khud hi shaheed hone se Islam me kamzori aane ka bhi dar tha aur musalmano ke hausle past hone ka bhi khatra tha. Isliye ye qurbani huzur ki taraf se aise shaks ko milgai jiski takleef Huzur ko apni takleef se bhi zyada mehsoos hoti thi aur jisko aapne apne jism ka tukda farmaya tha aur jiske liye aapne farmaya ki "Hussain mujhse hai, mai Hussain se hu".

🍂Koi beta baap se to ho sakta hai ya koi nawasa nana se ho to sakta hai magar baap ya nana ka bete se nawase se hone ka kya matlab hai aur ye baat kehne wale koi aam admi nahi balki Mehboob Khuda Nabi E Kareem Sallallahu Alaihiwasallam khud hain jinke liye Allah Ta'ala farmata hai "nahi ki Mohammed ne koi baat alawa mere hukm ke". Yaani Huzur Alaihissalam ne hamesha wahi kiya jo Khuda ne kaha to jab Huzur ne ye farmaya ki Hussain mujhse hai aur mai Hussain se hu to ye bhi aapne Allah ke hukm ke mutabik hi farmaya.

🍂Nabi E Kareem Sallalahu Alaihiwasallam ne farmaya ki Hussain mujhse hai aur mai Hussain se hun aur Nabi wahi kehte hain jo Allah ka hukm hota hai.

Ye baat logon ko us waqt samajh aayi jab Imam Hussain Alaihissalam karbala ke maidan me deen ki hifazat ke liye azeem qurbani pesh ki. Aisi qurbani jiski na koi misaal thi na hai na hogi, kyuki afzal tareen Nabi ki taraf se qurbani di gayi isliye azeem tareen qurbani hi di gayi. Us wat agar Hazrat Imam Hussain qurbani na dete to deen ka chehra bigad jaata, Islam me tamam kharabiyan paida ho jaati aur asal me Islam Islam rehta hi nahi balki khatm hojata. Is karbala ka waqiya hone ke baad logon ki samajh me aaya ki Huzur ne kyu farmaya tha ki mai Hussain se hu, yaani deene Mohammade ki hifazat karke aur isko dobara zinda karke Imam Hussain ne ye sahi sabit kardiya jo Huzur ne farmaya tha mai Hussain hu. Isiliye Khwaha Ghareeb Nawaz Razi Allahu Anhu farmate hain,

Shah Ast Hussain Baadshah Ast Hussain Deen Ast, Hussain Deen Panah Ast Hussain,
Sardaad Dast Dar Daste Yazeed Hakka Ke Binaye'n La Ilaha Ast Hussain

🍂Har imarat ko qayam rakhne ke liye buniyaad mazboot hona zaruri hai aur Islam ki buniyad Hazrat Imam Hussain tehraye gaye.

Ye azeem shahadat jo Huzure Akram Sallallahu Alaihiwasallam ki taraf se Hazrat Imam Hussain ne karbala me pesh karke Islam ko hamesha hamesha ke liye zinda wa tabinda kardiya. Isi shahadat ke tufail aaj Islam zinda hai, karodon musalman duniya me hain, masjidon se azaano ki awazein aa rahi hai, agar ye shahadat na hui hoti aur Hazrat Imam Hussain yazeed ki bait karlete to Islam khatm hojata aur duniya me Khuda ka naam lene wala koi baaki na rehta. Agar aisi qurbani wa shahadat ki yaad taaza karne ke liye aur aise shaheedon ke gham, takleefon, pareshaniyo ki yaad manane ke liye jisse har saal logon ka iman taaza hojata hai, agar log mohorrumdari aur taziyadari karte hain to us par wo log jinko Ahle Bait se bugz hai haram wa bida't ka fatwa laga dete hain.

Halanki log chaadar uthate hain, ghaagar uthate hain aur isi kism ke bahut se kaam karte hain is par koi bida't aur haram ka fatwa nahi lagata. Bahut afsos aur sharm ki baat hai ki apne buzurgon ki chaadar wa ghaagar uthana to jaiz hain aur Rasool Allah ke gharane ki shahadat ki takleefein, pareshaniyon aur musibaton ki yaad taaza karne ke liye mohorrumdari aur taziyadari karna bida't aur haram hai. Isko Ahle Bait se dushmani na kaha jaaye to aur kya kaha jaaye.

🍂Hazrat Imam Hussain ki shahadat agar Huzur Alaihissalam ki hayate zahir me ho jaati to ye yaad manana Islam ka usool hojata jaise Hazrar Ibrahim Alaihissalam ki qurbani ki yaad manana Islam ka usool ban gaya hai. Aaj bhi unki sunnat me bakrid me jaanwaron ki qurbani di jaati hai. Aise hi karbala ki qurbani ki yaad manai jaati magar Islam ka ussol banjane par to sab log isko manate aur ada karte lekin phir ye farq karna mushkil ho jaata ki kaun haqeeqat me Ahle Biat se sachchi mohobbat karta hai. Kyuki mohobbat karnewale ko ishara kaafi hota hai, aur mohorrumdari aur ghame Hussain manane ke liye saaf ishare maujood hain.

🍂Taziyadari ek pasandida aur maqbool kaam hai. Is silsile me bahut waqiyat mashoor hain. Hazrat Abdul Aziz Muhaddis Dehlwi ka is silsile me waqiya mashoor aur qabile zikr hai.

Ek bar Hazrat Abdul Aziz taziyadari ki mukhalifat me fatwa likhwa rahe the. Mohorrum ka zamana tha aur achanak us taraf se taziya guzra jise dekhkar muhaddis sahab unchi jagah se kudkar taziye ke saath saath haath baandhkar chaldiye. Lautkar aaye to unki aankhon me aansu jaari the aur haalat ajeeb horahi thi. Unhone talib ilmon se kaha ye fatwa phaad do. Talib ilmon ko bahut hairat hui aur pucha ki abhi to aapne fatwa likhwaya hai, ab kyu phadwate ho, to Hazrat Abdul Aziz ne kaha,

"Maine dekha ki taziye ke saath Rasool Allah Sallallahu Alaihiwasallam gham ki haalat me tashreef le jarahe hain. Maine salam pesh kiya to aapne dusri taraf muh pher liya. Maine dusri taraf jakar salam pesh kiya to aapne phir muh pher liya. Tab maine sabab daryaaft kiya to aapne farmaya tum apna kaam karo, mai to Hussain ke gham me karbala jaraha hun"

🍂Hazrat Shah Niyaz Beniyaz Rehmatullahi Alaih (Bareli Shareef) ka waqiya

Hazrat Shah Niyaz (Rehmatullahi Ta'ala Alaih) 10 mohorrum ki raat taziye ki ziyarat ke liye raat 2 baje zarur jaate the. Jab huzur ko kamzori zyada hui to dusron ki madat se jaate the aur 5 ya 7 taziyon ki ziyarat karke wapas aate the. Aur Hazrat ka ye mamool tha ki aap taziye ko haath lagakar muh aur dil par pherte the.

Is bar hazrat ek alim moulvi ki surat ke rehnewale ke saath the. Is bar Hazrat ne taziye ke takht ko bosa diya. Is par moulvi sahab me dil me khayal aya ki hazrat ne ye kya ghazab kiya. Hazrat Shah Niyaz Beniyaz Rehmatullahi Alaih me unka dil ka haal jaankar moulvi sahab ki peeth par haath rakha aur farmaya moulvi dekho. Moulvi sahab ne dekha ki taziye ki ek taraf Imam Hasan aur dusri taraf Imam Hussain tashreef farma hain. Ek sahab ke (Imam Hussain) kapde laal hain aur dusre (Imam Hasan) ke hare hain. Moulvi sahab dekhte hi gir pade aur itna roye ki unki haalat kharab hogayi. Hazrat wahan se dusre taziye ki ziyarat ke liye tashreef legaye.

Aakhir me jab aapko khade honeki chalne ki taqat nahi horahi thi kamzori aur beemari ki wajah se, to Hazrat Niyaz Beniyaz ne taziye ki ziyarat ka irada nahi kiya. Hazrat baithe the ki Hazrat Bibi Syeda Alaihissalam dikhai di aur farmayi'n ki miyan aaj hamare bachchon ki ziyarat ko nahi uthe.
Hazrat par rikkat taari hogayi, khuddam se farmaya jaise ho sake mujhe le chalo. Logon ne kaha chaarpai le chalo. Hazrat ne kaha nahi, jaise ho sake paidal le chalo. Tab 5 log dono taraf se kaandha lagakar Hazrat ko 5 taziyon ki ziyarat ko le gaye.

🍂Hazrat Khwaja Ghareeb Nawaz Rehmatullahi Alaih ki dargah me taziya sajta hai aur bahut zor se mohorrumdari hoti hai.
Hazrat mehboob E Ilahi ki dargah me bhi taziya sajta hai aur bahut zor se mohorrumdari ki jaati hai.
Hazrat Syed Shah Aale Rasool Sahab Mahrarwi wasiyat hai ki taziya sajakar pehle mohorrum se Hazrat Imam Hussain ke 40 we tak meri qabr par rakha jaaye.

🍂Jo buzurgaane deen hain jo Ahle dil hain wo mohorrumdari aur taziyari ko maante chale aaye hain aur agar khud nahi kiya hai to kabhi iski mukhalifat nahi ki.
Bahut se aise waqiyat hain jinhe padhkar aur sunkar sirf Ahle Bait se bugz aur dushmani rakhnewale log hi taziyadari aur mohorrumdari ki mukhalifaf kar sakte hain. Ya jinhe Allah ki taraf se hidayat nahi milti wo log aisi jurrat zarur kar sakte hain. Jiske dil me zarra bhi iman rahega wo kabhi taziyadari aur mohorrumdari ki mukhalifat nahi karega.

📘Kitab : Ahle Bait E Rasool