1.Gham E Imam Hussain A.S - Part 1

Hum sab musalman Allah ke fazl aur Nabi E Kareem Sallallahu Alaihiwasallam ki shafa'at aur inke sadqe bakhshish ki ummeed rakhte hain magar unki shafa'at se tabhi faizyaab ho sakte hain jab Huzur Alaihissalam aur unke Ahle Bait se mohobbat rakhein aur jab unse mohobbat hogi to unke gham me ghamgheen aur unki khushi me khush hona fitri baat hai.

🍂Aaj ke daur me log apne buzurgon ke aqeede ko bhoolte jarahe hain aur jo bhi zara mohorrumdari karta hai Hussain ka gham manata hai us par tarah tarah ke fatwe laga diye jaate hain, halanki Hussain ka gham wo gham hai jo har musalman par wajib hai aur Hussain ki shahadat wo shahadat hai jiske tufail me aaj Islam zinda wa tabinda hai. Aaj ka haal ye hai ki mohorrum me hare kapde pehenne tak ko haram ka matlab samjhe bagair haram karar diya jaata hai.
Duniya me bahut se musalman aur alim fazil log aise hain jo khullam khulla shara'a ke khilaf aur najaiz kaam karte hain magar us taraf koi dhyaan nahi deta magar ek gham e Imam Hussain aur mohorrumdari hai jiske piche kuch khaas log haath dhokar padgaye hain aur isko mitane me aise lage hue hain jaise yehi inki bakhshish aur najaat ka zariya hai.

🍂Mishkhat Shareef Jild 2 Safa 615 me Imam Baihaqi se riwayat hai ki Ehliya Hazrat Abbas farmati hain ki ek din Rasool E Khuda ki khidmat me hazir hokar arz kiya ki Ya Rasool Allah aaj raat maine ek bura khwab dekha ki aapke jism ka ek tukda kaatkar meri goad me rakh diya gaya hai, to Rasool Allah ne farmaya tu ne achcha khwab dekha hai In Sha Allah fatima ke yahan ladka paida hoga jo teri goad me aayega. Hazrat Fatima ke yahan Imam Hussain paida hue phir meri goad me aaye jaisa ke Rasool E Khuda ne farmaya tha.
Unhi se riwayat hai ki ek din mai Rasool Allah Sallallahu Alaihiwasallam ke yahan gayi, maine Hussain ko uthakar apni goad me le liya aur mai kisi aur taraf dekhne lagi ki achanak Rasool Allah ke aankhon me aansu agaye. Maine kaha Ya Rasool Allah mere maa baap aap par qurbaan aap kyu rote hain, farmaya Jibrael mere paas aaye hain unhone khabar di hai ke meri ummat mere is bete ko qatl karegi, Jibrael ne wahan ki laal mitti la kar dikhayi.

🍂Mishkat Shareef me hi hai Hazrat Ibne Abbas riwayat karte hain ki ek din dophar ke waqt me khwab me Rasool Allah Sallallahu Alaihiwasallam ko dekha aapke baal bikhre hain aur pair khaak me hain,aapke pas ek shishi hai jisme khoon hai. Maine kaha ye kya hai, aapne farmaya ye Hussain aur uske sathiyon ka khoon hai, aaj ise barabar samethta phir raha hun. Hazrat Ibne Abbas ne is waqt ko yaad rakha aur paaya ke Hussain usi waqt shaheed hue.

🍂Jab Imam Hussain Alaihissalam paida hue to Hazrat Jibrael Alaihissalam Allah Ta'ala ki taraf se mubarakbadi aur tajiyat (gham me pursa karna) saath laaye. Is waqt Huzur Alaihissalam aapke gale ko bosa de rahe the ki Jibrael ne khabar di ke is bosagaahe nabwi par choori phiregi aur ye bachcha raahe maula me shaheed hoga. Ye khabar Maula Ali Alaihissalam aur Bibi Syeda Fatima Zohra Alaihissalam ko Huzur Alaihissalam ne di to dono afarsuda hue aur janabe syeda ko ye gham hua ki mere bete par koi ronewala bhi nahi hoga tab Allah Ta'ala ne paigham bheja ke hum tumhare farzand ka gham qayamat tak barpa rakhenge aur yehi wajah hai ke aaj 1400 saal lagbhag ho chuke hain aur aaj bhi ye gham aise manaya jaata hai jaise ye ghatna isi saal ghati ho. Jiska gham Rasool Sallallahu Alaihiwasallam manaye aur Allah jo gham manwaye us gham ko kaun mita sakta hai.

🍂Hazrat Abu Imama Razi Allahu Ta'ala Anhu se riwayat hai ki Rasool Allah Sallallahu Alaihiwasallam ko hazrat Jibrael ne thodi si mitti karbala ki lakar di aur arz kiya ye us jagah ki mitti hai jahan Hussain Alaihissalam shaheed honge. Aap bahut ghamgheen hue aur aapne wo mitti Hazrat Abu Bakr aur Hazrat Usman (Razi Allahu Ta'ala Anhu) ko dikhayi aur farmaya, meri ummat Hussain ko shaheed karegi aur ye uske shahadat ke jagah ki mitti hai.

🍂Aapne hazrat Anas Bin Haaris se farmaya tha ki mera beta Hussain Iraq ki sarzameen jise karbala kehte hain, me shaheed hoga. Jo shaks tum me se wahan maujood ho usko chahiye ki uski madat kare.

🍂Hazrat Ayesha Razi Allahu Anha se bhi is waqiya ki riwayat hai. Aap Sallallahu Alaihiwasallam ne unko bhi wo mitti dikhayi aur farmaya tha ke mera beta Hussain tafh ki zameen me shaheed kiya jayega. Aapne wo mitti jo laal rang ki thi hazrat Umme Salma ke pas rakhwa di thi aur farma diya tha jab ye mitti khoon hojaye to samajh lena mera beta Hussain shaheed ho gaya.

🍂Dailmi ne hazrat Ammaar Bin Yasir (Razi Allahu Ta'ala Anhu) se riwayat ki hai ki Huzur Alaihissalam ne farmaya ki aasmaan Hazrat Yahya Alaihissalam ki shahadat par roya tha, ye mere bete Hussain ki shahadat par royega aur 40 din tak suraj laal rahega.

Hazrat Umme Salma se riwayat hai ki unhone Imam Hussain ki shahadat ke din sarwar e kaainat ko dekha aur aap ro rahe the aur aapke sare mubarak aur raish mubarak par gard padi hui thi. Hazrat Umme Salma ne sabab pucha to aapne farmaya mai abhi abhi Hussain ki shahadat ki jagah se chala aa raha hu. Us waqt jo khaak aapne hazrate Umme Salma ke pas rakhwa di thi wo taaza khoon ho chuki thi.

🍂Tareekhe Khulafa Allama Jalaluddin Suyuti, Safa 265 me hai ki Abu Naim ne Hazrat Umme Salma se riwayat ki hai ki maine Imam Hussain par jinnaton ko rote hue aur noha karte suna hai.

🍂Jahan tak Imam Hussain par rone aur gham manane ka sawal hai to shaheed zinda hain hain?
un par rone ki kya wajah hai ki baqaule shayar,

Rote hain Masaaib Par Hussain Ibne Ali Ke,
Hum Zindaaye Javaid ka Matam Nahi Karte

🍂Hazrat Imam Hussain Alaihissalam ko jin pareshaniyo, ghamon, musibaton, bhuk pyas ka saamna karna pada us par rote hain aur jaisa ki upar likha ja chuka hai ki huzur Alaihissalam Hazrat Imam Hussain ki shahadat ki khabar par (jo Hazrat Jibrael lakar diye the) khud roye the, Aur Imam Hussain ki shahadat par Huzur ka khwab me bhi rona dekha gaya tha, aasmaan suraj jinnat sab aapki shahadat par roye aur gham manaye.

🍂Paighambar Yaqub Alaihissalam apne bete Yusuf Alaihissalam ki judai ke gham me itna roye the ki aapke aansu naale me behte the aur zyada rone se aapke aankhon ki roshni chali gayi thi, tab Allah Ta'ala apne paighambar ko rone se nahi roka.

🍂Jab Owais Qarni Razi Allahu Anhu ne jung uhud me Huzur Alaihissalam ke dandaane mubarak shaheed hone ki khabar suni thi to ye sochkar ki pata nahi aapke konse daant shaheed hue hain, apne sab daant tod liye the.

🍂Jung e uhud me 70000 musalman shaheed hue the un sab ke gharon me rone aur aaho buka ki aawazein arahi thi tab Huzur Alaihissalam ne farmaya tha ki afsos Hamza (Razi Allahu Anhu) par koi ronewala nahi hai. Tab madeene ki aurtein Hazrat Hamza par rone ke liye jama ho gayi thi.

🍂Hazrat Jaafre Taiyyar ki shahadat par hazrate Bibi Fatima bahut royi thi aur tab Huzur Alaihissalam ne aapko nahi roka.
Hazrate Fatima Huzur Alaihissalam ke parda hone ke baad jitne din bhi zahiri hayat me thi barabar Huzur ko yaad karke roti rahi.

🍂Iske alawa agar kisi bade mufti moulvi ya alim ka jawan beta ya rishtedar achanak marjaye to wo na sirf dusron ko rone se nahi rokta, balki Khud bhi be ikhtiyar rota hai. Magar kitne hairat ki baat hai ki apna koi rishtedar mar jaaye to rone me koi harj nahi aur agar Rasoole Khuda ka pura khandan teen din ki bhuk pyas ki haalat me intehai zulm wa berehmi ke saath shaheed kar diya jaaye, shaheed honewalon me 6 mahine ke doodh peete sahibzaade, 18 saal ke jawan bhai shamil the, jab bibi sahibaaon ki chadarein cheeni jaayen, unhe be parda kiya jaaye, Rasool ki nawasi ke sar se chaadar cheeni jaaye, jab beemaar bete par kode barsaaye jaaye, jab bibi sahibaon ka khema jalaya jaaye, jab Rasool ka nawasa aur unke gharwale 40 din kafan rahe laasho mubarak ko ghodon ki taapo se raunda jaaye, wo bhi kiske liye Allah aur uske Rasool ke deen ki hifazat aur hum gunahgaron ki bakhshish ke liye. Tab aise gham par agar roya jaaye to usko najaiz aur haram kehna kaise jaiz hai?

Ye kahan ka insaaf hai, isko kya kaha ja sakta hai, isko bas bugz aur dushmani Ahle Bait ke alawa aur kuch nahi kaha ja sakta. Koi Rasool aur Rasool ke Ahle Bait ka mohobbat karnewala kabhi mohorrumdari aur Gham e Hussain par rone par fatwa nahi laga sakta.

To Be Continued ......Jaari.....

📘Kitab : Ahle Bait E Rasool